政情：有相為證：帶抗日老兵睇戲 陸頌雄眼濕濕
最近有一套關於當年抗日組織營救香港文化人嘅電影上映，工聯會立法會議員陸頌雄尋日帶同爸爸、兩個抗日老兵欣賞該部電影。陸頌雄話，電影如實反映當年東江縱隊嘅情況，而且係屬於真人真事，睇到佢同兩個老兵都眼濕濕。
陸頌雄透露，兩個老兵都有份參與當年嘅東江縱隊，同兩個親身經歷過戰爭嘅老兵欣賞電影，別有一番感覺。佢又話，好嘅電影要畀更多人認識，計劃同離島區議員鄧家彪一齊舉辦社區放映，仲搵咗體文界議員馬逢國幫手處理放映權問題，希望更多年輕人可以透過電影認識抗日歷史。