政情：小肥張認普通話唔掂要惡補
外號「小肥張」嘅政務司司長張建宗早前出席研討會時罕有以普通話發言，之不過就畀人發現普通話相當普通，包括把「一國兩制」講成「一國兩雞」等，過去主責勞工福利議題嘅小肥張尋日同傳媒聚會時話，自己以前無機會使用，又承認普通話發音不足，依家有上緊堂，強調會虛心學習，呼籲大家多啲同佢講普通話。
為官長達四十多年嘅小肥張出晒名係「工作狂」，佢提及公務生涯嘅點滴時話，由於公務宴會多數喺周末進行，試過一日內換三套衫，包括早上着波鞋，夜晚着「踢死兔」西裝，而且仲要喺公廁度換添。
冀明年重開「公民廣場」
另一方面，小肥張都有回應政界關注嘅多個問題，包括何時重開俗稱「公民廣場」嘅政府總部東翼前地，以及副局長及政治助理人選，小肥張話當局正研究開放政總東翼前地一事，希望明年可以達成呢個意願，佢又期望立法會十月復會時，各政策局嘅副局長同政助都齊人。