政情：霍啟剛打機唔沉迷支持搞電競
電競業喺全球興起，香港電競總會位於荔枝角嘅新會所尋日開張，香港青聯前主席霍啟剛、電競總會副主席楊全盛（Eric）等都有現身。霍啟剛話讀書時亦有打機，主力玩射擊遊戲及即時戰略遊戲，但佢同時提及，自己唔會太過沉迷打機，所以家人都冇阻佢打機，而長大後出來工作，已經冇時間打機嘞。
對於電競業於香港嘅發展，霍啟剛認為若然香港可以培訓更多電競人才，相信可以早着先機，因為佢相信，電競業再發展落去，成為奧運項目係大勢所趨。
楊全盛曾畀母親扭耳仔訓斥
Eric則話電競唔等於打機，因為電競可以培養年輕人嘅自信心，甚至提供發展機遇。講起那些年嘅打機史，Eric話自己年輕時曾喺機舖畀母親眾目睽睽下「扭耳仔」訓斥經常打機，佢笑稱自己如果遲出世十年，肯定會加入電競業。
同場仲有中華出入口商會副會長許華傑，原來佢會同囝囝一齊打機，不過係齊齊玩手機遊戲，一來佔用時間唔多，亦可以隨時隨地玩。