政情：波哥出新招紅牌抗拉布

限動議次數 被逐冇得即日回歸

財委會近年成為拉布嘅重災區，過去嘅議事效率一去不復返。波哥尋日出席電台節目時透露，過去一個項目撥款需要平均一個多小時審議，但本立法年度每個項目撥款嘅審議時間，就增加至平均需要五小時，而且拉布招式愈來愈多，例如有議員利用縮短表決時間鐘聲議案嚟拉布，民主派議員就不斷提出休會辯論，加上難以將行為極不檢點嘅議員趕走，事關被趕走嘅議員於下一節會議，即兩小時後又可以返回會議室「搞事」，形容自己真係身受其害。

波哥其後更爆seed，直指當年議事規則係「防君子不防小人」，並爆料指有議員反發展，用激烈手段抗爭，但為咗一勞永逸，波哥終於出招建議更改財委會會議程序，主要涉及兩方面，包括若果議員被趕離會議室，就全日唔可以再返回會議室，以及限制議員提出臨時動議嘅次數。

波哥否認以上建議係趁泛民多人被取消議員資格後乘人之危，或者落井下石，因為有關建議只要多於一半財委會委員支持就可以通過，建制派本來就有足夠嘅票數。波哥又話，有關建議係有先例可循，好似財委會早年審議廣深港高鐵工程時，就限制每個議員只可以提出兩項臨時動議。

不過，陳健波兩招建議甫曝光，就有民主派公開表態反對，其中民主黨議員許智峯表明，唔可以因為議會上多咗激進聲音，就將議員權利愈收愈緊，形容此舉會將財委會等同橡皮圖章，事先張揚民主派會搵機會向波哥表達不滿，又警告波哥若「夾硬嚟」會進行激烈抗爭。

事實上，依家財委會會議安排同早年嘅財委會做法大不同，早年嘅財委會係猶如大會直落進行，中間唔會有休息時間，亦都唔會好似依家分開每兩小時一節會議，分幾節進行，等議員期間可以小休抖一抖，目前呢個安排亦意外造成有議員於首節被逐出會議室，下一節可以重返議會拉布抗爭嘅奇怪局面，波哥今次要出手撥亂反正，勢必會面對唔少反對聲音，就睇下可否頂住壓力堅持到底嘞。