中環出更：縮短口頭質詢預告期 建制有分歧
立法會議員負責監察政府施政，並將民意反映畀政府知道，理論上於議會上，有機會更緊貼社會脈搏，向高官提問依家社會最關注嘅問題，會獲得跨黨派議員齊齊支持，點知原來有部分建制派議員反對將立法會大會口頭質詢嘅預告期縮短嘅建議，理由竟然係縮短預告期後時間太短，議員唔可以暢所欲言喎。莫非有議員驚自己睇唔切新聞，於會上「有口難言」無得發揮？
泛民普遍支持
立法會議事規則委員會（委員會）早前建議將大會口頭質詢嘅預告期由目前嘅七日，縮短至會議舉行前嘅周五中午，同時唔再規定當局提前將書面答覆送交立法會秘書處，委員會早前去信諮詢全體議員有關縮短預告期嘅意見。
立法會議事規則委員會主席謝偉俊話，近期陸續收到議員回覆，發現反應唔太理想。佢透露，泛民普遍支持口頭質詢縮短預告期呢個建議，但就有部分建制派有保留，認為唔應該作出改動。
謝偉俊又話，打算先仔細整合反對嘅理據，加上有好多議員未有回覆，唔知佢哋係贊成定反對，依家仍未決定係咪擱置縮短預告期嘅建議，佢又希望十月立法會復會後再同一眾議員傾吓，再作決定。
卓妮