中環出更：曾智明練靶參與飛鏢節
飛鏢近年喺香港大行其道，日前仲搞咗第一屆香港國際飛鏢節。飛鏢節喺九龍灣舉行，唔少名人都有到場試玩，有啲更落場參加邀請賽。百仁基金副主席曾智明當日都在場，佢拎起飛鏢都似模似樣，原來佢已經玩咗好多年喇，仲買過鏢靶返屋企練習添。而香港中華廠商聯合會青年委員陶俊裕姿勢就十足，不過原來佢係唔識玩嘅，佢就笑笑口話志在參與喎。
第一屆飛鏢節除咗有多個隊伍參加比賽外，現場仲有唔同攤位同音樂表演，氣氛好似嘉年華咁。一班名人就獲邀出席大會嘅邀請賽，其中曾智明就同幾個朋友一齊組隊參賽。卓妮就見曾智明擲得唔錯，原來佢好耐之前都玩過，仲買埋鏢靶自己喺屋企練。不過後來因為玩到悶，就少咗玩喇。佢又話，以前放工不時都會同朋友去飲吓嘢同擲鏢輕鬆吓，仲講笑話飲番兩杯先擲飛鏢會仲淡定啲喎。
陶俊裕組隊參賽 八強止步
陶俊裕就同廠商聯會青委主席顏明秀及廠商會會董孫榮良等人組隊參賽。雖然陶俊裕同顏明秀都唔係好識玩，但佢哋嗰隊誤打誤撞都喺十六隊當中打入八強，不過最終都係八強止步，無緣進身決賽。同場仲有自由黨深水埗區議員李梓敬。李梓敬就話，平時開完會都會同黨友一齊去玩吓飛鏢。佢仲形容自己「一玩就上癮」，仲買埋返屋企玩添。雖然佢屋企有小朋友，不過佢就唔怕屋企人反對，又話自己多數都係趁小朋友瞓咗先玩，而且個鏢靶都唔算好嘥位啫。佢又透露，有時囝囝見到都想玩，佢都會畀囝囝試吓，反正都係膠鏢頭咁話。
飛鏢工房創辦人徐詠琳就話，因為膠鏢頭擲向牆或跌落地好易爛，所以初學者練習時最緊要買多啲鏢頭，佢又提醒大家練還練，但唔好太搏命，因為佢就試過狂練三個鐘，搞到第二日關節痛，要睇醫生之餘仲被迫停玩一段時間添。
卓妮