政情：團體唔識鄉議局 鄉紳拒科水
鄉議局尋日舉行執委會，由於鄉議局教育康樂及文化委員會收到團體邀請佢哋合辦海外華僑粵劇匯演，所以佢哋就討論係咪應邀合辦，以及係咪撥款十萬元作實報實銷開支。不過多名鄉紳就表明反對，究竟點解？原來班鄉紳係嬲團體唔識鄉議局個大名。
由於團體早前已租咗活動場地，所以活動唔會喺鄉議局場地舉行。不過錦田鄉事委員會主席鄧賀年就認為，鄉議局大劇院更適合作活動表演場地。委員會於是解釋，團體發出邀請前已租用場地，改唔到，而且呢班海外華僑返港冇耐，除咗沙田大會堂之外，其他場地都唔太認識。
僅答允協辦匯演
鄧賀年聽完後就嬲爆，炮轟團體連鄉議局「咁大個朵」及「劉業強（鄉議局主席）個大名」都唔識係講唔通，質疑對方因缺錢先諗起鄉議局，又話元朗七鄉搞活動都係自己籌錢，應該有能力先舉辦活動。荃灣鄉事委員會主席鍾偉平亦都表明唔支持，話要用鄉議局資源同場地先合情合理，亦可宣傳鄉議局。結果班鄉紳就決定唔批呢筆撥款，但就會以委員會名義去協辦有關活動。