政情：羅冠聰被DQ累立會欖球隊難產

多名議員「得把口」支持

Holden同另一立法會議員譚文豪早前牽頭去信行管會，要求成立跨黨派非撞式欖球隊。Holden當時仲話，唔少議員以前都有玩過欖球，相信組隊冇難度。點知行管會尋日就成立運動隊一事去信議員，話雖然有廿一個議員支持成立欖球隊，但大部分都係「口講支持」，真係表明參與嘅就只有六個議員。由於未達組隊所需嘅最少七人，欖球隊組隊終告失敗。

有人就話，立法會唔少議員都已經一把年紀，仲點會玩欖球呢啲咁激烈嘅活動。不過Holden都好努力，仲好難得可以湊夠七個人，估唔到少咗羅冠聰就連組隊都組唔成。但亦有人透露，行管會早喺法庭宣布裁決前已開會討論組欖球隊事宜，估計同羅冠聰被取消議員資格冇直接關係。

至於其他運動如羽毛球、乒乓球、籃球、網球、高爾夫球同排球都有人建議組隊，但行管會考慮諮詢結果，同埋有關運動能否有利接觸公眾人士等因素後，決定現階段唔會增設任何立法會運動隊伍，即係足球隊繼續「一隊獨大」，做立法會唯一官方運動隊，而足球隊下個月就會同香港潮屬社團總會比賽。

對健身室設備要求多多

另外，有議員要求喺立法會大樓議員專用健身室，增設划艇機同乒乓球設施，同埋移走較少人用嘅兩部電視機同兩張梳化。行管會經討論後決定取一個中間方案，就係保留一部電視機同一張梳化，並增設一部划艇機。立法會係議員辦公地方，班議員對健身室要求多多，佢哋喺立法會究竟係辦公定「扮工」呢？