中環出更：前常秘楊立門 嘲民政局「垃圾局」
有「AO歌王」之稱嘅民政事務局前常任秘書長楊立門（Raymond）做咗香港中華廠商聯合會行政總裁無幾耐，佢同傳媒午宴時就講起，自己同新一屆政府嘅問責班子早有淵源，佢仲曾經寫現任嘅發展局局長黃偉綸，同埋政制及內地事務局局長聶德權嘅報告。另外Raymond仲講笑話民政事務局係「垃圾局」添。
由於政府新聞處隸屬於民政事務局，而黃偉綸同聶德權都做過新聞處處長，所以當時任民政事務局常任秘書長嘅Raymond就寫過佢哋嘅報告。而眾所周知，新聞處負責嘅範疇並唔止民政事務局，所以Raymond都話，當時寫報告前都會周圍問吓其他人嘅意見先寫。
因好多政策都要幫手
Raymond又講笑話民政事務局係「垃圾局」，因為好多政策都要幫手搞。佢在任時就負責處理過關愛基金項目，仲搵咗當時係學者嘅現任勞工及福利局局長羅致光商量。佢又話，因為羅致光好幫得手，令佢亦相對輕鬆好多。Raymond又講起，羅致光約咗廠商會下星期一（24日）傾有關取消強積金對沖事宜。Raymond依家就講到羅致光之前咁幫得手，唔知係唔係賣口乖呢？
卓妮