中環出更：徐英偉自爆讀書年代怕醜仔
講起讀書那些年嘅事，相信唔少人都會回味。早前香港青少年領袖發展協會就「模擬立法會」活動舉行開幕禮，仲邀請咗民政事務局前局長政治助理徐英偉（Caspar）同埋幾位立法會議員包括鍾國斌（Felix）、梁繼昌、楊岳橋（Alvin）去到一間小學介紹立法會嘅工作。幾位男士即刻「回到校園時」，大談學生時代嘅趣事。其中任政助時負責政治游說工作嘅Caspar仲自爆佢讀書時原來係怕醜仔添。
細個喺外國讀書嘅Caspar自爆自己讀書時係怕醜仔一名，只會對熟人先多嘢講。唔少朋友知道佢依家嘅工作要經常上台講話，都唔信佢會有咁大轉變。佢自己就話呢個轉變可能同當年喺學校玩電台有關，再加上進入職場後多咗同其他人接觸，漸漸就冇咁怕醜喇。
楊岳橋用學生雜誌玩整蠱
Alvin平日表情多多，經常整古做怪，好多人都以為佢細個一定好百厭。佢就話其實自己以前做過班長，都「好建制」喎。不過佢喺加拿大讀中學時，就同一班朋友搞學生雜誌，試過趁愚人節同全校開咗個大玩笑，就係利用雜誌封面，發放假消息指就讀嘅男校即將改為男女校，搞到唔少同學信以為真，都幾盞鬼。
Felix就自爆中學時成績一般，係去英國讀書時先至「開竅」。佢認為外國奉行小班教學，老師較專注，佢亦唔想浪費家人嘅付出，加上所處小鎮娛樂少，所以就專心讀書。雖然佢中學時成績唔好，但佢就話自己絕對唔係曳仔，從來無試過畀老師體罰咁醜怪。佢講起當年體罰「招式」如厚間尺打手板、筆碌手背時仲七情上面。其實佢當年係唔係怕被罰先變得聽話咋？
卓妮