政情：年結呻慘做主席「好孤獨」梁君彥不勝寒

梁君彥上任初期爭議極大，因為佢十月代表建制派角逐立法會主席時，被踢爆九月中先向英國申請放棄國籍。呢件事為泛民主派提供大量「彈藥」，喺佢上任之初不斷質疑佢唔符合《基本法》規定，因而唔肯承認其主席身份。過去一年嘅會議中，有唔少泛民議員一直稱呼佢為梁議員，而唔係主席，擺明落佢面。

除咗國籍風波之外，梁君彥亦面對青年新政游蕙禎同梁頌恆嘅辱華宣誓風波，令佢主席生涯起步甚艱難。當時佢一度裁決，若游梁提出再宣誓嘅要求，佢會批准兩人重新宣誓。話口未完，港府就提出司法覆核圖推翻其裁決，令佢處境十分尷尬。呢件事亦惹起建制派議員強烈不滿，仲喺翌日嘅立法會大會上策動流會，阻止游梁再宣誓。當時建制派普遍對梁君彥嘅處理手法有意見，認為佢事前未有同建制派協商，更一度傳出有人要求更換主席添！

唔熟書 頻休會為徵詢秘書處

另外，梁君彥喺過去一年，都冇批出一條緊急質詢而惹人詬病，亦多次需要休會作出裁決。佢尋日就回應話，裁決係基於《基本法》，亦要按照《議事規則》，唔可以因個人喜好而定。佢又認為，今屆議員嘅行為較以往有「創意」，所以要較頻繁咁休會，以便向秘書處徵詢意見喎！照咁講，即係佢自認唔夠熟書喇！

按統計，今個立法年度一共點算咗九十五次法定人數，總共花費十六小時，亦有兩次因法定人數不足而休會。

雖然梁君彥升呢做主席後諸多阻滯，不過隨着游梁宣誓風波塵埃落定，建制派中已經無再傳出換人聲音，日前亦有香港傳媒對比英國內政部蓋章同梁君彥曾展示嘅文件，向英國內政部查證最快兩日可以脫離英籍，成功還梁君彥清白，相信佢個主席位應該會坐得更穩，最壞嘅時間已經過去。