家陣電子競技已經變成大型活動，世界各地更加有好多電競比賽讓各國高手以打機嚟競逐獎項同獎金，真係諗唔到原來打機都可以搵錢！其實世界上仲有好多職業同打機有關，例如日本寫真女郎，因為唔少遊戲展都會搵佢哋擔任展銷女郎，而水澤柚乃亦係因為打機而投身寫真界，同時佢係一名聲優，可謂人靚聲甜。
小弟由細到大都鍾意打機，同兄長一齊打機正係童年時最快樂嘅回憶，當中亦夾雜住唔少痛苦回憶，因為我哋兩兄弟就係因為成日打機，而經常被母親大人鬧到七彩！如果母親可以預知到未來的話，相信就唔會鬧，反而會鼓勵我哋打多啲機，因為家陣有好多打機達人搵到盤滿缽滿，參加電競比賽仲可以贏獎金添！水澤柚乃呢位寫真界新貴都係因為鍾意打機，繼而展開寫真事業喇。
今年19歲嘅水澤柚乃天生一副楚楚可憐嘅樣子，男人見到一定好想將佢抱一抱，好好呵護一番。不過，當阿妹笑起上嚟又顯得天真活潑，充滿陽光氣息，真係令人又愛又恨。而柚乃嘅身材則勻稱鮮嫩，聲稱上圍有H Cup，但係點睇都唔多似，似乎有報大數之嫌，不過總算唔係平胸一族啦！
柚乃妹投身寫真界之前，因為身段姣好而做過泳衣模特兒，不過令佢成為寫真女郎嘅契機就唔係因為呢份工作。柚乃本身係一名狂熱嘅電子遊戲迷，最鍾意玩音樂遊戲及格鬥遊戲，但係大家唔好以為女仔打機唔叻得去邊喎！早前柚乃上載咗一段打機片段，當中阿妹表演點樣玩音樂遊戲《Sound Voltex Booth》，其技巧之高令觀眾們都睇到大吃一驚，證明乃妹唔係得個樣。由於柚乃對打機有濃厚興趣，促使阿妹去做遊戲展展銷女郎，就喺呢個時候，被巨尻女王倉持由香睇中佢呢份熱誠以及迷人身段，將佢推薦畀藝能事務所，於是就成為寫真女郎喇！
除咗拍寫真，柚乃亦係一名聲優，仲同其他聲優姊妹組成偶像團體組合「Magic And Maiden」，不時齊齊登台獻唱，為樂迷帶來動聽樂曲。
簡介：水澤柚乃除咗會喺Twitter分享性感自拍照，亦會將自己嘅打機進度公開，如果大家都係機迷，不妨同柚乃交流一下打機嘅心得喇！
網址：https://twitter.com/mizuyuno_
年齡：19歲
身高：5呎1吋
三圍：34-24-35
撰文：賢