家陣香港地搵食艱難，打工仔百忍成金，保住飯碗第一要緊，偏偏民航處最近爆發離職潮，空管人員大拿拿十皮嘢人工都劈炮唔撈，唔通真係同錢有仇？
嗱，民航處喺短短三個月內就有三名逾廿年經驗嘅二級空管主任辭職，而過去四年辭職嘅二級或以上空管主任更多達十人，較之前四年足足多出四倍，你話冇唔妥就假。要知道，空管主任閒閒哋十萬八萬蚊人工一個月，有啲仲高達十二萬蚊，話係筍工都絕不誇張，咁都劈炮走人，原來唔係嫌錢腥，而係擔心有錢冇命享啫。
點解咁講？咪又係關嗰套爛鬼空管系統嘅事囉。大家都知，新空管系統自啟用以來大小事故不斷，鬼機、疊影、警報誤鳴、間距不足、航班消失乜都齊，單係首月就出現八十次偵測錯誤。之後愈爆愈大鑊，早排仲試過死機添，卒之要啟動後備系統救命，空管人員嚇到腳都軟埋，心理壓力有幾大，唔使問都知。梗係啦，空管系統關乎航空及人命安全，萬一發生空難，隨時孭鑊上身，監都有得坐（口架）。
唔係講笑，幾年前空管人員接受新系統操作訓練嗰陣，已經feel到問題多多，遲早賴嘢，結果真係開口中。最激氣係管理層唔正視問題不特止，反而怪罪員工向傳媒爆料，仲學人玩捉內鬼，空管人員搵埋都唔夠錢買驚風散，心灰意冷咯喎，下堂求去都好正常啫。
咪以為人手流失係好小事，香港話晒係國際航空樞紐，一時間失去咁多有經驗嘅空管人員，新頂上嘅人員經驗未必足夠，萬一出現突發事故而處理不當，後果不堪設想。再講吖，機場第三條跑道一旦落成，航班升降量勢必進一步增加，現有人手都不足以應付需求，何況愈走愈多人，對航空安全點會冇影響吖。
講嚟講去，都係民航處管理混亂、港府放任自流惹嘅禍，而當年拍板入貨嘅前特首曾蔭權爵士有眼無珠，留低咁大個爛攤子，更係累人累物。唔係咩，呢套價值十五億元嘅空管系統，貴而無當，國際上劣評如潮，偏偏港府廢柴當沉香。最好笑係港府高官仲要幫承辦商講好說話，唔係用「磨合」做擋箭牌，就係賴地硬，話香港地勢影響雷達資訊接收喎，真係乜都噏得出，有人質疑當中涉及官商勾結，睇怕空穴來風未必無因囉。
呢嗱，有立法會議員就講得啱嘞，爆發離職潮明顯係民航處管理出咗問題，應該走嘅並非空管人員，而係民航處高層。冇錯嘞，物必先腐而後蟲生，唔將民航處嘅腐肉切除，結果就係病入膏肓，醫番都嘥藥費嘅咋。