政情：郭基泓三度挑戰垂直馬拉松
第六屆垂直馬拉松賽事尋日開始正式公開接受報名，兩項賽事「勇闖香港ICC」及「勇闖上海IFC」分別於十二月三日及十月二十二日舉行，新鴻基地產執行董事郭基泓及新地執行董事兼副董事總經理雷霆都會再次參賽，兩人有信心跑得快過上一年。
楊鎧駿將赴菲爭標
郭基泓話今次係第三次參加，事前會參與公司的訓練班，希望成績可以好過上一年。而雷霆亦參加咗兩屆，佢話第一次用咗二十九分鐘完成賽事，去年則較前一年快咗半分鐘，今年喺與年紀及衰老抗衡的情況下希望可以再快十秒八秒，甚至兩秒都好喎，又話會積極備戰，認為多運動對身心都有好處。
出席啟動禮嘅仲有去年「垂直馬拉松世界巡迴賽」精英跑手楊鎧駿、小腦萎縮症跑手鄺家豪、中大矯形外科及創傷學系教授容樹恒及中大營養研究中心首席營養師史曼媚等。去年以十四分十四秒成績完成比賽的楊鎧駿，今年將往菲律賓馬尼拉挑戰巡迴賽，現時勤於練習，又透露下一個目標係跑巴黎鐵塔，真係少啲氣力都唔得。