政情：馮煒光遊北韓 懶理導彈狂影女
北韓無視國際社會反對，宣稱成功試射洲際彈道導彈，令朝鮮半島局勢升溫，之不過喺同一時間，早前卸任新聞統籌專員嘅馮煒光身處北韓，唔知佢喺當地係睇唔到網上新聞，定係佢已經身經百戰有大無畏精神，佢喺當地竟然「狂影女」，更加將唔少自己與當地女性嘅合照上載到Facebook。
Facebook相簿大放合照
曾自稱為「白宮發言人」嘅馮煒光正在北韓旅遊，連日來喺Facebook都有關於北韓旅遊嘅貼文及相片，當中除咗當地風景相，亦有唔少佢同當地美女嘅合照。
馮煒光其中一則貼文以「平壤『地標』－女交通警」為題，影完個女警正面，再影埋人哋背面，另外相簿內亦有唔少佢同北韓女士嘅合照，仲有幾幅係同一批女學生嘅合照，莫非佢想喺北韓物色埋另一半？