政情：僧多粥少 富二代爭做人大打崩頭

梁穎宇想接梁劉柔芬棒

現時三十六名人大當中，最少有六人已公開表示唔會角逐連任，包括港區人大代表團團長譚惠珠、前立法會議員劉健儀及梁劉柔芬等人，當中多人均係女將。綜合多方消息指，最少有六名「富二代」爭崩頭想染指加入人大呢個國家最高權力機關，其中取態最為明顯係梁劉嘅女兒梁穎宇，早前已出關於創科發展新書吸納支持者，有政界人士分析，梁穎宇想更上一層樓嘅最大障礙，就係梁劉退任，佢隨即接棒，給予外界直接傳位嘅觀感問題。

另外多名「富二代」都從事青年工作多時，分別是霍啟剛、張俊勇、前全國政協常委楊孫西嘅兒子楊華勇等人，另外政圈盛傳立法會主席梁君彥嘅兒子梁宏正、行政會議成員林健鋒嘅兒子林凱章亦有意參選人大一試身手。

政圈分析霍啟剛呼聲高

眾多潛在參選人中，政圈分析霍啟剛染指人大嘅呼聲最高，一方面佢叔叔霍震寰現時係人大，政圈熱傳佢會轉換跑道至全國政協；另一方面，曾任香港青年聯會主席嘅霍啟剛於政圈打滾已有一段時間，多次就青年、體育界問題對外發聲，亦有參加商會工作，整體履歷較為全面。

除此以外，張俊勇係另一個有競爭力嘅潛在參選人，分析指佢五年前參選雖然落敗，但喺冇有關方面祝福下取得六百多票，出乎大家意料之外，算係超額完成，一般相信，佢今次捲土重來會取得唔少「同情票」。至於楊華勇等潛在參選人，共通點都係從事青年工作，加上有商會背景，預料數人未必可以齊齊「升呢」，勢必掀起一場龍爭虎鬥。

不過，一句到尾，由於人大選舉係採取全票制度，無論係「富二代」又好，以致係有專業背景嘅政界人士，最後都可能基於現實考慮，無可避免要聯票去爭取有票在手嘅政商界團體支持，更多嘅合縱連橫策略曝光，隨時可以左右最終選舉結果，大家要拭目以待嘞！