中環出更：蔣麗芸讚父親製西瓜波創先河
香港創新科技發展被指進展緩慢，落後於深圳等內地城市，立法會尋日討論有議員提出革新過時法例，促進創新科技發展嘅無約束力議案，立法會議員蔣麗芸爆料，指香港創新技術曾經風光一時，稱其父親蔣震幾十年前發明俗稱西瓜波嘅紅白間條塑膠足球，其實曾經得獎無數。
述舊時嘆港創科乏發展
究竟西瓜波同創新科技有乜關連，原來蔣震於五十年代末發明咗一部機器，可以同時噴出兩種顏色嘅塑膠料，用以製作西瓜波，由此觀之，蔣麗芸話香港創新技術曾經風光一時，都有一定嘅根據。
蔣麗芸其後發言時把香港創新發展歸咎於反對派拒絕一切同內地合作嘅機會，佢舉例指，內地手機錢包已經可以給予結婚人情同新年派利是，但香港至今仍然只得八達通。體文界議員馬逢國則指，依家網上侵權普遍，要求當局加強版權保障嘅工作。
泛民議員陳淑莊列舉新加坡政府鼓勵創科嘅做法，指佢哋不但會為科研項目包底，而符合資格嘅初創企業更會獲得政府優先考慮採用，佢促請港府於政策上為初創企業拆牆鬆綁。
卓妮