中環出更：話劇癮發作蕭楚基甘願扮賣粥
唔少商界人士嘅奮鬥故事令人津津樂道，原來佢哋都好鍾意睇人哋嘅故事。卓妮早前喺一個話劇活動上見到香港話劇團理事會主席蒙德揚，以及話劇團理事會第二副主席蕭楚基，其中蕭楚基透露自己特別鍾意睇古裝嘅話劇，之前無落過場演出，因此蠢蠢欲動想粉墨登場，佢笑言喺話劇入面扮賣粥都得，認真玩得。
香港各界婦女聯合協進會（婦協）與勤+緣慈善基金早前舉辦《我們的故事》首演禮，唔少城中名人都出席欣賞，婦協永遠名譽主席林貝聿嘉話，今次故事由香港話劇團改編自婦協名譽會長梁鳳儀嘅同名小說，講述一九四九年喺香港發生嘅故事，別具意義。
蒙德揚留鬚 家人嫌污糟
身為信興集團主席兼行政總裁嘅蒙德揚就同女兒一齊現身捧場，現場所見，蒙德揚嘅形象好似有少少轉變，上唇留咗鬚，佢話係因為早前喺屋企執嘢，見到爸爸後生啲舊相都有留鬚，所以自己又試吓跟住留咁話，咁佢屋企人有乜嘢反應？蒙德揚話，家人笑佢好似好污糟喎。
同場仲有香港廣東社團總會首席會長王國強、香港女工商及專業人員聯會創會會長黃汝璞、康樂及文化事務署署長李美嫦等人。黃汝璞笑言退休可以多啲時間睇話劇，又透露近年搵番啲中學同學及老師，除咗定期一齊去旅行、聽講座學嘢外，上年仲去咗伊朗旅行，至於今年就計劃緊去歐洲。
黃汝璞雖然退休一段時間，但容貌keep得唔錯，佢透露秘訣除咗多啲笑之外，原來仲要每晚做臉部運動，沖完涼由頸到面頰每邊向上按摩二十下，認真係日子有功嘞。
卓妮