政情：李敬天為琴行唔賣中樂器解畫
近年愈嚟愈多人學中樂，但係市面上幾間大型琴行連鎖店幾乎唔賣中樂器。點解？早前見到上海總會常務理事李敬天（Frank），佢係老牌琴行第二代揸弗人，傾開先知中、西樂器嘅做法南轅北轍，西樂器講究大量生產及標準化，但中樂器就多數手工製造，佢哋試過跨界做埋中樂器，最後都係放棄算喇！
多數手工製 做法好唔同
Frank話西樂器嘅生產過程標準化，而且大量生產，最好係確保每一個相同等級嘅樂器質素一模一樣，但中樂器就講求手工，特別係貴價同高端樂器，更加追求靚料及獨一無二。由於做法好唔同，所以佢就專心做番西樂器，行國際化路線。
話內地業務係增長重心
行國際化路線唔代表唔會去內地做生意，反而內地先係業務增長嘅重心。Frank話公司喺內地只做批發，唔做零售，但係生意已經做唔晒，因為始終學樂器嘅都係小朋友。內地啱啱就開放咗二孩政策，睇嚟呢盤生意長做長有喇！