政情：入調查委員會 象哥代「鼎」做箭靶

CY收取澳洲公司UGL五千萬港元，令到立法會成立專責委員會調查，而當時嘅專委會副主席周浩鼎竟然按照CY意見修改專委會擬議調查範圍，換嚟譴責同被調查嘅下場。而立法會內務委員會喺上月底根據《議事規則》，通過就譴責周浩鼎議案而成立調查委員會，並且會喺本周五嘅內會上選出七名委員，當中包括一名主席、一名副主席同五名委員，但陳志全、朱凱廸等提出同聯署贊成譴責議案嘅議員就唔能夠加入。

若提名人數冇增加 名單自動落實

現時有七名議員獲提名加入調查委員會，有五人屬於建制派，分別係「建制班長」商界廖長江、工業界吳永嘉、經民聯石禮謙、工聯會陸頌雄同埋進出口界象哥，由於被提名嘅議員都要簽署證明接受提名，足證民記冇選擇避席。至於泛民就只得兩個人獲提名，分別係民主黨同公民黨代表，提名期喺昨夜十二點屆滿，若然最終提名人數都係得七個，呢個名單就會正式當選而毋須進行投票。

其實象哥同周浩鼎分屬師徒，早喺周浩鼎未進身立法會前已成日帶佢亮相，而喺今年五月份一次立法會會議上，象哥更率先上演「師傅救徒弟」一幕，因為會議上會處理譴責周浩鼎議案，象哥不惜發動「拉布」接連要求記名表決，企圖拖延譴責議案提交立法會嘅進度，而佢當時亦承認係政治行動。

象哥同周浩鼎關係咁密切，假如真係入咗調查委員會，必定惹嚟偏袒之嫌，肯定畀人插到變箭豬，唔通佢想代周浩鼎受靶？象哥接受查詢就明言師傅都可以教訓徒弟，佢更話自己行走江湖多年，無咁容易做箭靶喎。