廣東人有句俗語︰「畀個廁所所長你做。」咪以為只係講笑咁講，現實中有啲廁所所長揸住雞毛當令箭，鍾意放邊個入去就放邊個入去，操方便予奪大權，真係好大嘅官威囉！
話說有位失明歌手日前同家人去社區會堂「聽電影」，為免錯過劇情，諗住開場前去殘廁方便咗先，點知居然畀職員喝罵，雖然事主出示政府發出嘅「殘疾人士登記證」，證明確有資格使用殘廁，但對方一於少理，強調只有輪椅人士可使用，就算失明人士都冇情講。最離譜嘅係，職員以命令口脗喝令事主用完廁所記得抹番乾淨，否則唔准走人。喂，對方睇唔到嘢已經夠不幸，仲要喺人哋傷口上灑鹽，咁就唔止惡意刁難咁簡單，直頭係涼薄冇人性！
身殘不可怕，腦殘至可怕，唔知失明人士係唔係殘疾人士，話唔係腦殘都冇人信。冇錯，門口標誌淨係畫咗輪椅人士，冇標明失明人士，但獨腳人士拄拐杖嚟到，斷估你唔會拒諸門外啩？呢嗱，本報記者之後視察案發地點，發現會堂內有指示失明人士嘅引路設施，殘廁門外亦有凸字，而民政事務處亦知衰，承諾嚴正跟進事件，好明顯有人玩嘢逞威風喇！
強者憤怒，抽刀向更強者；弱者憤怒，抽刀向更弱者。民政事務處轄下嘅廁所所長耍威風，固然係中國人有權必濫劣根性嘅表現，其他部門職員亦係一擔擔，好似食環署販管隊咁，對住賣一蚊紙皮、用清水洗地嘅阿婆如狼似虎，要拉要鎖，告將官去，正正係典型例子。本是同根生，相煎何太急，大家都係基層打工仔，搵餐晏仔啫，使唔使去到咁盡，恰得就恰吖！
講番失明人士被欺壓呢單嘢，點解平機會主席陳章明至今好似仲未見影？陳章明前排至話需要為殘疾人士提供教育培訓、就業輔導以及日常生活需要等配套設施，家陣失明人士用個殘廁都要歷盡艱苦，講乜都嘥氣。陳章明唔去保障殘疾人士權益，但酒吧搞「女士之夜」反而差隻腳埋去，不務正業，添煩添亂，唔好得過前任周一鑊幾多嘅咋。
見微知著，香港地殘疾人士條路真係好難行。唔使講第樣，淨係講無障礙通道一瓣，港府一二年大鑼大鼓推出「人人暢道通行」計劃，聲稱要增設有關設施，眨吓眼過咗五年，結果又係雷大雨小。復康巴士服務亦係一樣，長期供不應求，連申訴專員公署都批評過，可惜當局批評接受，態度照舊，情況至今未有改善。
一千句漂亮話，不如做一件實事。高官開口埋口關懷弱勢，恤苦憐貧，講到底咪又係葉公好龍！