政情：嘗過做局長 蕭偉強形容係神迹
多名不留任嘅局長先後與傳媒道別，勞工及福利局局長蕭偉強尋日亦喺茶敍中坦言從冇想過做局長，仲形容係「神迹」，又自爆做局長每一日都覺得好長，即使出任副局長，亦係由張建宗邀請他，佢當時更對張建宗講「唔好玩我」。
話好掛住張建宗
講起張建宗，蕭偉強直言「好掛住佢」，又形容由勞福局局長升為政務司司長的張建宗係「標準長工時」，模仿對方長期服務係「高難度危險動作」。佢話張建宗曾自爆「打呔就興奮」係「百分百真實」，愈多工作佢就愈精神，又聽聞張建宗早年「諗住近近哋」同家人到內地玩兩日，點知張建宗過咗羅湖橋就身體不適，回港後因為有工作，馬上就變得精神。
寄語下任搵副局
蕭偉強又自爆當年離任復康專員時，原本有七個月嘅假期，但遭對沖，最終僅獲兩個月假期「補水」，及後突然由副局長升為局長，亦失去約兩、三個月嘅假期。其實佢一月署任局長時並冇副局長，已經等同要做兩個人嘅工作，至四月常任秘書長又離任，工作壓力更大。佢笑言寄語下任局長羅致光，要盡快搵副局長分擔工作添！