政情：莫嘉嫻退黨 鬧阿基未瞓醒
民協早前通過內部初選，舊年立法會敗選嘅馮檢基（阿基）參選九龍西補選，決意「永續參選」。而曾經話阿基堅持出戰會退黨嘅民協前主席莫嘉嫻亦言出必行，退黨申請已於上周六獲中委會通過。對於阿基仍堅持要搵知名度高嘅人參選，莫嘉嫻直指佢好似仲未醒，亦認為佢唔會勝出，因為市民心態已變，有知名度嘅人被唾棄。
對內部初選感失望
莫嘉嫻喺民協通過初選前一日發電郵畀黨主席施德來申請退黨。佢接受查詢時話係因為對整個內部初選安排感到失望，所以冇等結果就提出退黨申請。佢重申一直認為民協要有新人新氣象，唔支持阿基代表民協出選，認為初選偏離咗佢嘅原意。
佢又話喺近年嘅選舉中，市民已透過選票反映意願，希望由新人參選，指阿基仍堅持覺得立法會補選係要搵有知名度嘅人參選，「好似仲未醒……我覺得（阿基）唔會贏到，因為市民嘅心態已經改變，有知名度嘅人被唾棄」。佢形容退黨唔係容易嘅決定，因已加入民協十幾年，第一份工就係打民協工，但就話將來唔排除加入民主黨，但目前仍需要考慮，包括視乎會否繼續從政、家人意願等。
曾有意參加黨內初選、民協副主席何啟明話挽留莫嘉嫻不果，因為對方去意已決，對於任何人離開都會感到可惜，而佢就無意退黨嘞！
