政情：徐英偉過檔勞福局 傳民政局送埋嫁妝
政府換屆在即，新班子上周曝光，民主黨前成員羅致光將執掌勞工及福利局，成為唯一一位新面孔，我哋早前寫過，民政事務局局長政治助理徐英偉，盛傳將「升呢」轉任勞福局副局長，去（目及）實民主派出身嘅羅致光。據了解，徐英偉近日亦開始為新職位做準備，甚至準備埋「嫁妝」，有機會將民政局管理嘅「蒲魯賢慈善信託基金」帶埋過去勞福局。
政團力推 冀基金一條龍管理批核
民政事務局現時管理多項慈善信託基金，但部分基金名不經傳，好似蒲魯賢慈善信託基金咁，支援孤兒寡婦同喪失工作能力嘅本地工人，基金截至舊年坐擁二億六千幾萬元，但係申請資格同申請方法等細節欠奉，皆因所有申請須經勞福局轄下社會福利署或勞工處協助先能夠申請，透明度低之餘，又涉及跨局行政拖慢效率，申請宗數難免偏低。
據了解，工聯會一直希望將蒲魯賢慈善信託基金轉由勞福局管理，貪可以「一條龍」式管理同批核，同時期望可放寬申請資格，令受到工傷而又不至於喪失工作能力嘅本地工人，喺養傷停工期間都可申請基金作為生活津貼，但建議一直只聞樓梯響。直至近日盛傳徐英偉將調到勞福局擔任副局長，工聯會即力推有關建議，認為如由熟悉民政局運作嘅徐英偉出手，成功率高之餘，日後基金去到勞福局點樣運作，徐英偉亦可以接手繼續處理。
我哋向徐英偉查詢，佢承認上星期接手研究蒲魯賢慈善信託基金，睇吓有乜嘢地方可以改善，仲承認有同政黨商量添！至於基金係咪有機會轉由勞福局接手管理，佢就話「未聽過咁嘅事」。其實現屆政府得番幾日任期，如果徐英偉如傳聞咁調去勞福局，喺呢個時間叫佢研究蒲魯賢慈善信託基金，無疑係送份「嫁妝」畀佢帶埋去勞福局，唔知候任局長羅致光歡唔歡迎呢份厚禮呢？