中環出更：肥彭陰魂不散 又對港事務指指點點
末代港督彭定康（肥彭）尋日喺英國倫敦出席新書發布會，又再「回魂」對香港事務「指指點點」，聲稱最近一、兩年有迹象顯示北京正收緊對香港嘅掌控，包括香港嘅司法獨立同法治都受到攻擊，院校自主亦受到威脅；佢又話北京拒絕與香港爭取民主的聲音對話，令到部分人走向極端。
肥彭聲言，中央領導人應該重申已故領導人鄧小平對「一國兩制」嘅承諾，又稱與其將「一國兩制」當成口頭禪一樣不斷重複，北京應該更理解香港各種制度嘅意義。
類似論調十日前已發表
不過，肥彭唔同意香港一啲青年同學生爭取香港獨立，因為香港唔係一個國家，堅持獨立只會被強硬嘅北京玩弄於股掌之間，亦會令民主運動失去好多支持，佢認為香港應聚焦喺爭取民主同法治，好過走上「港獨」嘅分岔路。
其實肥彭類似「指指點點」嘅論調，早喺十日前透過預先錄製嘅影片已出現，當時佢質疑北京近年收緊對香港管治，嘗試干預港府每個環節，更稱香港三權分立中嘅「立法」一環倒退，令港人難免變得激進，多名政界人士均狠批對香港事務指手畫腳，顛倒是非黑白。
卓妮