中環出更：林亮自傳將面世 老婆開心過自己
創業夢人人有，但想要夢想成真兼且取得成功，就唔係個個都得。港產陀飛輪錶創辦人沈慧林（William）最近出咗本書講述創業成功嘅故事，早前舉行新書分享會時見到「中國變形金剛之父」林亮同太太戚小彬（Shelly），林亮見到卓妮就報喜話，佢本寫咗六年幾嘅自傳終於完成，今年書展可望面世。
林亮嘅創業故事令人津津樂道，幾年前由Shelly幫手執筆寫自傳，依家終於寫完，共有十四萬字咁多，難怪Shelly表現得仲開心過老公。至於書名仲未決定，Shelly話想搵中文大學前校長金耀基改個靚名喎。
轉頭見「玩具大王」蔡志明兒子蔡加讚（Karson），講起創業，Karson一出身就要接手龐大嘅玩具同地產王國，想實現創業夢都唔咁易。Karson就話鐘錶同汽車生意都係由佢呢一代開始做，都算係創業嘅。
孫秉樞靠游水行路護骨
從事鐘錶業嘅李文偉（Gary）同太太嚴偉貞做生意之餘亦好有善心，早前籌辦咗一場免費為四百幾位長者做骨質疏鬆症檢查嘅慈善活動。Gary話好多老人家通常跌倒或骨折後先知有骨質疏鬆，所以活動旨在提醒六十歲以上長者要留意。
九十二歲嘅「鐘錶大王」孫秉樞身體好硬朗，唔知佢點護骨呢？佢就話日日游水同行路。William嘅媽媽許麗琼好認同，事關佢亦有骨質疏鬆症，醫生叮囑要日日急步行半小時，最緊要做運動。
卓妮