中環出更：蔡毅明佗B仔 朋友叫設計唐裝
近年旗袍風潮回歸，款式愈出愈時尚，除咗市面上多咗啲租借旗袍嘅舖頭外，仲有設計師開舖賣自家設計嘅旗袍，希望將穿着旗袍嘅文化重新普及。早前卓妮見到設計師蔡毅明（Grace），新舖剛開張嘅佢現時懷孕四個幾月，可謂雙喜臨門。雖然佢今次佗住嘅係囝囝，冇得幫小朋友扮靚，但啲朋友就慫恿佢可以考慮出埋男裝、即係唐裝，咁囝囝出世都可以着喇！
呢日Grace腹大便便現身出席舖頭開張，一大班名人好友撐場，見佢雖然着住貼身旗袍，但手腳卻同之前一樣咁瘦，原來佢呢幾個月體重都冇乜點上升，因為嘔得太犀利，非常辛苦！
沈慧林話囡囡旺佢
呢位準媽媽仲不忘向在場嘅港產陀飛輪創辦人沈慧林請教湊仔經驗，事關沈慧林早前「升呢」做咗爸爸，佢透露B女出世之後嗰十幾日基本上都冇覺好瞓，但依然都係好開心同感恩嘅。佢又話自己雖然幫唔到手餵奶，但就會負責掃風，體會到太太同媽媽有幾偉大，佢仲笑言囡囡真係好旺佢，出世之後呢個月，生意額竟然突破佢咁耐以嚟最高，但佢就因為咁而更加忙囉！
轉頭仲見到長衫薈成員翁狄森、陳淑芝、馬朱雪履、杜珠聯及李漢樑等。講起現時除咗返工，出街一樣可以着旗袍，一件過唔使襯衫夠晒方便，唔少政商名人都愈嚟愈鍾意，陳淑芝更透露最近唔少朋友都搵佢設計旗袍兼用作慈善用途，佢仲話另一成員李漢樑有製作好多數碼圖案布款，可以考慮用嚟做材料喎。本身係珠寶設計師嘅翁狄森亦好熱愛中國文化，除咗設計中國珠寶，亦不時着唐裝，認為比西裝更加涼快同舒服喎。
卓妮