特首梁振英（CY）連日嚟化身鍵盤戰士，喺網誌狙擊泛民議員梁繼昌，指梁作為立法會UGL事件專責委員會成員存在身份衝突，要求梁辭去委員。建制派議員葉劉淑儀尋日都忍唔住開腔，批評以CY咁高嘅地位，有咁多重要嘅管治工作，卻花咁多時間，日日針對梁繼昌，仲話「利用政府嘅資源，就佢個人一啲糾紛，不斷針對一位議員，我個人覺得係唔恰當嘅」。葉劉講得都算有啲保留，其實潛台詞就係鬧CY公器私用囉！
