外表冷冰冰嘅女生係咪一定唔吸引？咁就要睇吓佢嘅性格，係咪同佢嘅外表一樣咁冰冷。男人總係希望心目中嘅女神，私底下表現得熱情如火，好似南韓人氣模特兒千寶英咁，就係屬於外表冷艷，內裏活潑可愛嘅女生，輕易俘虜男士嘅心。
有人話外冷內熱嘅性格，係同佢嘅出生地有關，如果出生於偏遠地方嘅話，畀人嘅感覺總係會冰冷啲。不過呢個講法用喺千寶英身上，就一啲都唔適合，皆因喺韓國首爾出生嘅佢，並非生於偏遠地方，而係喺大城市中長大，佢天生一副美人胚子，五官標致，自細已被人讚靚女，長大後身材高挑，擁有當模特兒嘅條件，故一邊讀書一邊兼職做Model，不過佢冇諗過喺模特兒界發展，反而希望成為一位電腦編程員，但係後嚟點解會走咗去做模特兒呢？講出嚟都幾奇怪，因為佢覺得做編程員冇時間扮靚，加上當時有模特兒事務所游說佢當全職模特兒，經過考慮後，決定趁年輕嘗試一下，以平面攝影模特兒出道，及後喺釜山國際車展以汽車品牌站台模特兒身份登場，憑住出眾嘅外形，引起大家嘅注意，尤其係佢一對修長美腿相當煞食，更被稱為最令男人心動嘅美腿。呢次處女演出不但令佢人氣急升，亦令佢充滿自信，之後喺幾個大型車展上演出，佢嘅表現都有驚喜。冇幾耐，佢喺釜山舉辦嘅遊戲展G-Star上以Show Girl身份亮相，亮麗又性感嘅造型，成為展場嘅焦點。挾住愈嚟愈高嘅人氣，佢以賽車女郎身份於一級方程式賽事南韓站中登場，而呢次嘅演出更令佢人氣大爆發。
出道未夠一年，千英已先後喺平面模特兒、車模、遊戲展Show Girl及賽車女郎4個唔同界別發展，真係冇番咁上下實力，都難以做得到。為咗更上一層樓，佢參加第2屆南韓賽車女郎大賽，結果獲得最佳表演者獎。可能有人會問乜嘢叫做表演者獎呢？原來外表冷艷嘅佢，內裏卻熱情如火，而且活潑可愛，喺比賽中個人表演環節上，佢講咗一個笑話，配合生動有趣嘅表情，獲得評判及觀眾一致讚賞，大家發現呢位冰山美人，原來個性風趣，口才亦相當了得。事實上，寶英喺訪問時，亦表現到出色嘅急才同口才，難怪佢喺第4屆南韓賽車女郎大賽獲得最佳廣播表演者獎。究竟佢嘅口才係點樣練成嘅呢？原來喺讀書時，佢係校內辯論隊嘅主將，難怪咁好口才啦。曾有人問佢有冇興趣投身娛樂圈，但係佢表示冇呢個打算，理由係覺得自己冇演戲天分，加上佢對模特兒工作充滿興趣，故此喺未來日子都唔會加入娛樂圈。問到佢最想做嘅一件事係咩，佢就話希望考到車牌，可以享受一下駕車嘅樂趣。
簡介：如果唔係透過賽車女郎比賽嘅話，真係唔知外表冰冷嘅寶英，原來性格係咁活潑同熱情。大家想了解佢多啲，以及欣賞佢嘅靚相，就要Click入呢個網喇！
網址：http://cafe.daum.net/love-bbo
出生地：首爾
身高：172cm
三圍：33、25、33
撰文：魂