政情：謝偉銓敗選復活入熱廚房？
政府即將換屆，但候任特首林鄭月娥籌組政府班底嘅情況似乎並唔明朗，掌管政府三司十三局嘅人選唔係中央唔接受，就係有人臨陣縮沙。最新有傳本身為專業測量師嘅立法會建築、測量、都市規劃及園境界前議員謝偉銓（Tony），將出任新一屆政府發展局局長。Tony舊年喺立法會選舉以近五百票敗予現任建築界議員姚松炎，如果Tony真係出任局長，將會同民政事務局局長劉江華一樣，成為第二個敗選後「復活」加入政府嘅官員，甚至比當年初入政府時只係出任政制及內地事務局副局長嘅劉江華更巴閉。
有最新消息指出，現任發展局局長馬紹祥六月三十日後將唔會留任，Tony將會接任局長。Tony尋日透過短訊回覆我哋時並冇明確否認傳聞，只係話自己依家唔喺香港，對有關傳聞不予置評，希望稍後可以講多一啲。真係欲言又止、有口難言咁款。
馬紹祥無回應去留
據悉，Tony喺最近一個飯局當中都冇提過會做官，反而席間仲有人問到，牽涉立法會議員宣誓風波嘅姚松炎萬一被取消議員資格，佢會唔會捲土重來參加補選。如果Tony真係有心加入政府，都認真口密。而馬紹祥尋日再被傳媒問到去留問題時亦都冇回應。
舊年十一月被政府委任為物業管理業監管局主席嘅Tony，其實早於七十年代喺香港理工學院畢業後已加入政府工務局任見習產業測量師，十二年間擔任多個職位，離開政府時為高級產業測量師。測量界對於Tony出任局長都表示支持，皆因Tony曾經喺政府工作，又做過測量師學會會長同立法會議員，人脈廣之餘亦對相關政策範疇非常熟悉，喺工作協調上亦唔使擔心喎。
陳帆「升呢」管運房局
另外，現任運輸及房屋局局長張炳良早已表明唔會留任，有傳機電工程署署長陳帆將會升任運房局局長，而保安局常任秘書長羅智光將出任公務員事務局局長。不過，政府有關高鐵一地兩檢方案即將擺上立法會，民主派已表明有關方案將遇上極大阻力，加上尚未完工嘅港珠澳大橋屢次爆鑊，陳帆一旦上任應該要立即上陣拆彈，預料唔會再有蜜月期嘞！