中環出更：畀人鬧到飛起 周浩鼎仍無人識
民建聯嘅立法會議員周浩鼎被指同特首辦「打龍通」，按特首梁振英嘅意見修訂擬議範圍文件，周浩鼎過去一周都係新聞人物，唔單止畀泛民窮追猛打，連建制派內部都鬧到飛起，最終周浩鼎拖延多時先「跪低」辭去立法會UGL事件專責委員會副主席，但周浩鼎似乎冇因而「受惠」，其人氣繼續谷極都冇起色，最新出爐嘅市民最熟悉十大政治人物，周浩鼎仍然不入十大，排第十一。
是次調查由港大民研計劃於本月十五至十八日進行，剛好就係周浩鼎捲入「打龍通」事件愈演愈烈之時，結果受訪者喺冇提示下講出多至十名嘅最熟悉政治人物，被轟至體無完膚嘅周浩鼎剛好排喺第十一，無緣進入十大。
游梁知名度大不如前
排喺周浩鼎後面有一批政府高官、立法會議員同一批本土自決派人士，其中近期不時「唱衰香港」嘅香港眾志秘書長黃之鋒，排名第二十五，而其黨友、立法會議員羅冠聰則排第三十六。
至於舊年十月因宣誓辱華風波遭取消議員資格嘅青年新政游蕙禎同梁頌恆，分別排第四十及五十四，兩人嘅知名度隨着時間過去，真係大不如前。
卓妮