傳媒嘅天職係針砭時弊，不平則鳴，如果一味隱惡揚善，報喜不報憂，咁咪同官方喉舌冇分別？所以話，香港勝在有第四權，社會公義至得以彰顯咋。
不過咁，一樣米養百樣人，有人係都要挑起矛盾至安樂。呢，公院醫療事故長爆長有，淨係呢排咋，繼聯合醫院開漏藥害慘好媽媽之後，又有瑪嘉烈醫院為腎病少女洗血時刺穿動脈致癱，簡直鑊鑊新鮮鑊鑊甘，如果唔係醫生粗心大意，醫院瞞上欺下，點會全城鬧爆吖。傳媒報道有根有據，絕對唔係無的放矢，偏偏醫學會會長蔡堅就唔係咁諗，佢話傳媒專登將病人同醫生置於對立面，令醫患失去互信，雙失雙輸喎，咁即係點？即係倒果為因囉。
蔡醫生身為業界代表，幫自己人無可厚非，但都唔好偏離事實吖。佢話喎，有啲傳媒唔止報道醫療事故，仲將事件拉扯到修改醫委會條例上，仲話醫學會一向支持改革，即係暗示傳媒批評業界醫醫相護係抹黑啫。但大家有眼睇，改革醫委會條例草案之所以被拖垮，全賴醫學界立法會議員一夫當關拉布所致，如果業界真係咁重視病人權益，真係冇醫醫相護，點會搞成咁？仲有喎，前線醫生呢頭呻人手不足呻到樹葉落，嗰頭一聽到輸入外地醫生即刻群起反對，又係為乜呢？
話時話，本港醫療水平每況愈下早就唔係新聞咯，開錯腦、換錯心、輸錯血、打錯針、左右不分輪番上演，簡直無奇不有。睇番數字吖，醫管局過去五年共接獲逾一萬二千宗投訴，淨係上個年度已有二千八百宗，創近年新高。至於當局花費於庭外和解嘅賠償額就仲誇張，高達五千萬元，平均每宗個案獲賠近五十萬元。事實擺在眼前，到底傳媒報道事實係製造矛盾，定係有人擔心「家醜」外揚，企圖臭屎密冚，逃避監督，畫公仔唔使畫出腸喇。
良藥苦口利於病，忠言逆耳利於醫。有立法會議員就講得啱嘞，傳媒係監察者角色，有關報道反映事實，出發點唔係針對醫生，係為醫療制度好，為病人好啫。醫界連正面批評都唔肯接受，唔怪得醫療水平不進反退，事故層出不窮咯。
講真，家陣香港只有少數私家醫院尚能保持一貫水準，但收費昂貴，唔係一般市民負擔得起。近年香港移民潮再現，歐美國家成為首選，固然有諸多考量，但唔少人貪當地醫療水平高過香港，最重要係病人權益有保障。好似英國吖，唔止早就設有獨立投訴機制，醫委會嘅非業內人士仲足足佔一半，杜絕醫醫相護，人哋做得到，香港做不到，阻力喺邊大家心照喇！