唔少人總係覺得南韓嘅模特兒係就係樣靚身材正，卻嫌佢哋有種冷若冰霜嘅感覺，雖然有啲表現得活潑可愛，但硬係差少少親切感。不過南韓迷人嘅模特兒有咁多，點可能冇既活潑可愛，同時又親切入屋嘅模特兒呢？張智宥正正係其中一個好例子。
出生於南韓首爾嘅張智宥，擁有甜美嘅樣貌，以及有相當睇頭嘅身材，尤其係一對修長美腿更係非常養眼，不過佢最吸引嘅地方，係活潑可愛嘅性格，加上予人親切感，因而獲得相當高嘅人氣。早喺2011年投身模特兒界嘅佢，原來入行前從未接觸過任何關於模特兒嘅工作，咁點解佢會選擇做Model呢？事緣有次喺朋友聚會中，有朋友問佢有冇興趣試吓模特兒工作，佢以為朋友開玩笑，便笑稱如果有適合嘅工作嘅話，唔介意嘗試，結果朋友將佢推薦畀模特兒事務所，而擁有迷人外形及活潑氣質嘅智宥，即時獲得取錄，就咁樣開始咗模特兒生涯。
最初智宥同大部分模特兒一樣，以平面模特兒工作為主，後來事務所安排佢喺韓國國際遊戲展示會登場，智宥表示當時佢好擔心自己應付唔嚟，但係機會唔係常有，況且公司推薦得佢去做，必定係對佢有信心，於是膽粗粗接下呢個工作，佢坦言抱住「自己係新人，有失手亦在所難免，相信其他人唔會怪佢」嘅心態演出，正正係呢種輕鬆心態，令佢表現得相當自然，一啲都唔似新進嘅模特兒，而迷人嘅外形更係成為展示會上嘅亮眼焦點，憑住呢次出色嘅演出，人氣直線攀升。
自從處女演出獲得成功後，唔單止令佢自信心大增，事務所亦放膽畀佢嘗試更多大型嘅工作，自此以後佢經常以Show Girl身份喺各類型展覽及展銷活動登場。隨住人氣及經驗不斷累積，佢嘅活動範圍亦不斷擴張，2012年佢首次以賽車女郎身份喺韓國公路錦標賽中演出，以性感賽車女郎造型示人嘅佢，不但盡情展現火辣身材，甜美笑容更吸引一眾攝影師嘅鏡頭，加上佢活潑可愛兼表情豐富，令人氣瞬間爆升，其名字無人不識。
成為賽場常客嘅智宥，同年7月以車模身份喺首爾車展上亮相，而呢次嘅演出征服咗唔少男人嘅心，令愈嚟愈多人對佢產生好奇，究竟呢位活潑可愛嘅美人兒，平時係咪都咁得人歡心呢？唔少攝影師表示，佢哋喺同模特兒工作時，先要花啲時間熟落一下對方，先至可以令拍攝變得順利，但係張智宥卻唔同，因為性格活潑嘅佢，好快就同大家熟落起嚟，而佢樂天又充滿正能量嘅個性，往往令攝影室充滿歡笑聲，同時攝影工作相當順利。可能有人會問，愛笑嘅智宥會否展現冷艷一面呢？呢層大家唔使擔心，因為作為專業模特兒嘅佢，當攝影師有要求時，總會表現到恰到好處嘅冷艷感，智宥表示能夠做到呢點，其實有自己一套秘訣，就係回想起以前讀書時，老師冷冰冰嘅表情，佢就可以模仿到出嚟啦。
簡介：每當見張智宥時，都會被佢火辣嘅身材吸引，尤其係激凸嘅上圍，令人心動不已，不過佢唔係經常以性感造型示人，可能正正係咁，佢每次演出都會令人有所期待。如果大家想了解智宥多啲，就Click入呢個網站喇！
網址：http://cafe.daum.net/jiyujang
出生地：首爾
身高：170cm
三圍：34、23、34
撰文：魂