政情：申辦國際會議 吳得掂疑甩底

教局否認 稱指摘冇實據

葉建源尋日喺立法會發言時大爆，吳得掂曾經喺一五年向國際教育會議會方表示，香港有意舉辦一七年度嘅會議，當時會方邀請佢出席舊年三月喺德國柏林舉行嘅會議，正式提交計劃，但會方舊年多次聯繫吳得掂，卻不獲回覆，而吳得掂到最後根本冇去開會。當時會上有負責人公開表示不滿，而今年嘅國際教育會議亦因此改由蘇格蘭舉辦。葉建源大鬧吳得掂冇交帶，令香港喺國際上產生負面印象，更加令香港蒙羞。

究竟有冇咁嘅事？教育局回應時話有關國際教學專業會議事宜，教局喺舊年一月已通知主辦單位，唔會出席三月份喺德國舉行嘅會議。發言人仲話葉議員喺冇實據下提出指摘，對此表示遺憾。

至於申辦ISTP，教育局局長曾喺一五年加拿大舉行嘅會議上表示有興趣，但當年已敲定一六年嘅會議會喺德國舉行，至於一七年則冇作實質討論。