政情：共享單車出事Greg蘇潛水
突然空降香港嘅共享單車GoBee.Bike，搞到滿城風雨，未停過咁出事，真係近年少見！原來，呢間公司係投資推廣署引入香港嘅，據悉喺傾緊嗰陣，署方完全冇同其他政府部門講，直至推出前兩星期先至講，當時相關嘅部門即刻彈起，講明一定會出事，點知間公司都係照推出，而呢個署嘅頂頭大佬，商務及經濟發展局局長蘇錦樑（Greg）至今仍然隱形，完全唔見人、唔幫手解決，唔知係咪等收工就諗住唔使問責呢？
GoBee.Bike嘅新聞層出不窮，被指霸公共單車泊位兼隨街違泊、非法霸佔汽車車位，又畀人偷零件，有幾部單車仲畀人丟落河，仲要租用程式有保安漏洞，真係鑊鑊新鮮鑊鑊甘！
冇諗配套 硬推應市
引入呢間公司嘅投資推廣署，理應「湊好個仔」，幫手聯絡其他政府部門，搞掂晒所有配套，先安排間公司好好睇睇咁面世。點知，原來署方完全冇幫嗰間公司諗過泊位等配套，仲要推出前約兩星期先同其他部門講。據悉，當時政府內部已經講明，沙田同大埔本身已經唔夠單車泊位，有違泊嘅情況，尤其係沙田個區較細，本身已經面對嚴重嘅單車違泊問題，加埋GoBee.Bike，該區實爆煲！
不作善後 扮唔關事
但係GoBee.Bike一意孤行，堅持推出，政府部門嘅預言亦完全應驗，而Greg蘇至今都扮唔關事，完全冇出過嚟回應一句，亦冇幫GoBee.Bike安排善後，唔知係咪以為唔提就唔存在責任呢？
其實沙田區議會早早就傾過想引入共享單車，立法會議員葛珮帆當時身兼沙田區議員，佢話當時政府唔肯搞，佢哋搵非牟利團體搞，但因為顧及守法，所以想安排十幾個地點泊單車，但係要地政批准，又需要有政策支持，大呻佢哋想守法咁就做唔成，其他人搞共享單車就導致違泊影響個社區。