瞞上欺下向來係內地官場慣技，估唔到港產官僚好學唔學，竟然學埋呢一套，仲要唔係一般衙門咁簡單，而係涉及人命嘅公營醫療機構，一個大話冚一個大話咯喎，點會唔爆煲吖！
紙包唔住火，好媽媽鄧桂思之所以搞到兩次換肝，原來係聯合醫院兩名專科醫生疏忽大意，開漏乙肝抗病毒藥物所致。咁大鑊，明顯係嚴重醫療失誤喇，偏偏一早知情嘅聯合醫院瞞得就瞞，不但冇向家屬交代，甚至冇向醫管局呈報，直到家屬主動問起，冇法子再瞞落去，先至死死氣公開認衰。喂，人命嚟o架，點可以咁兒戲o架！
咁都未算，醫管局高層出嚟解畫，愈講愈離奇，一時話涉事醫生放緊大假，要「等埋醫生」，一時話家屬考緊文憑試，先至延誤通報喎，咁嘅藉口都噏得出，簡直當人白癡。呢，醫學會會長蔡堅就講得啱嘞，因為一個人放假就令成個機構停頓，唔止講唔通，直情令人慚愧，尤其現今科技發達，上網又得，打電話又得，點會聯絡唔到醫生呀，擺明有心拖延喇。
咪係囉，你估家陣仲係飛鴿傳書嘅年代咩，醫管局身為監管機構，被蒙在鼓裏本身已係失職，出咗事仲要千方百計隱瞞造假，包庇護短，仲有冇離譜啲吖。好嘞，衰咗就例牌成立委員會裝模作樣調查一番，諗住咁就過到骨，都好着數啫。咪畀功夫茶批中，所謂調查只係走過場，最終又係無人問責嘅咋。
仲有喎，食衞局局長高永文一直矇查查，懵盛盛，爆大鑊先至如夢初醒，一樣係失職。難為佢老哥尋日仲死撐話相信跨醫院、跨聯網嘅醫療隊伍有良好溝通喎，咁同喺家屬傷口上灑鹽有乜分別呀。鬼咩，夕陽政府時日無多，傳聞高局長不再留任，一味等收工咯喎，梗係乜都話之你啦。
大家睇到喇，食衞局監管不力，醫管局爛到入心，所謂嘅通報機制形同虛設，就算醫院冇及時呈報，不單止冇罰則，就連口頭警告都冇，放任自流咯喎，唔亂象叢生至奇。再講吖，醫管局烏煙瘴氣都唔係朝夕嘅事，山頭林立不特止，仲衰到肥上瘦下，資源分配嚴重不均。呢，好似出嚟解畫嗰位高層吖，年薪幾百萬，有乜貢獻大家睇唔到，公院醫療事故長爆長有就有目共睹，換着私人機構，呢啲庸官冗員唔炒魷魚都要減薪啦，邊得佢咁疏乎呀，社會怨氣愈演愈烈，家陣知點解喇。
點都好，人命關天，絕對唔容許半點含糊，家陣除咗要盡力搶救好媽媽，更要有責必問，當局點處理，全港市民(目及)到實o架。