繼沙田區議會交通及運輸委員會日前為民生事項破紀錄開會九個半鐘之後，前晚大埔區議會亦唔執輸，轄下嘅環境、房屋及工程委員會委員亦開會近六小時，但超時原因竟然討論係咪喺區內種植椰菜花或西蘭花？
委員會前日下晝兩點半開會，首先花咗三小時討論區內骨灰同房屋用地，其後討論到由六名民主派區議員提出喺大埔區內種植櫻花樹嘅議題時，就發生「鬥氣」風波。
當時多名建制派議員提出修訂，建議除咗櫻花樹外，亦應嘗試種植吊鐘花等本土植物，認為長遠有助吸引外地旅客來港觀賞。雖然議題毫無政治成分，但民主派眼見提出嘅議題被修改，亦不甘示弱，再建議多款花種如木棉花同劍蘭等，其中議員任萬全更「玩嘢」提出不如種植椰菜花或西蘭花，仲仔細地詢問可行性有幾大。結果喺雙方鬥氣下，原先預料討論二十分鐘嘅議程，要花多一倍時間近一小時先完成，而議題最終亦通過修訂。
事後部分議員批評民主派議員嘅做法係發晦氣，議員譚榮勳指萬一「種植椰菜花」獲通過，將成為全港笑柄，亦令市民質疑大埔區議會嘅會議質素。但最終會議亦因討論種植椰菜花佔去過多時間，至晚上八時半時因人數不足而流會。