政情：殯儀館變議辦地標 涂謹申嚇親人
作為資深議員嘅民主黨（白鴿黨）涂謹申，喺街擺易拉架理應駕輕就熟，但近日睇到佢嘅宣傳易拉架，有幅「辦事處地點示意圖」。咦？點解阿涂嘅議辦搬咗去殯儀館，睇真啲，原來係殯儀館附近，但地圖以大字標出殯儀館作為前往辦公室嘅地標，真係好令人誤會，隨時嚇親街坊o架嘛！
出事嘅易拉架其實好普通，議員彩色半身照配上姓名，但係仔細睇睇右下角，會發現一幅「辦事處地點示意圖」，但唔知係為咗慳錢抑或設計偷懶，嗰幅地圖係黑白色嘅。原本黑白地圖都唔係大問題，但地圖中嘅標示，除咗大角咀道外，就只有「九龍殯儀館」，而且更以巨型字體配黑底白字，極為搶眼，比辦事處位置嘅字體更大，途人行過驟眼睇嘅話，隨時以為涂謹申嘅辦事處位於九龍殯儀館，個心仲唔離一離咩。
馮家強忍唔住出聲批評
途經見到呢個易拉架嘅教協總幹事馮家強，早前就將易拉架照片上載到facebook，指路過見到白鴿黨喺街賣獎券，但佢見到個易拉架都頂唔順批評下，對呢個黑白地圖設計嘅感想係「想點」。阿涂作為現時立法會最資深嘅議員，擺易拉架咁多年，今次用黑白地圖將議辦「搬入」殯儀館，認真老貓燒鬚。