政情：七一留任否？ 高永文蘇錦樑走夾唔抖
七月一日政府換屆，有人漏夜趕科場，自亦有人辭官歸故里，到時現屆政府嘅政治問責官員定必各散東西。盛傳食物及衞生局局長高永文同商務及經濟發展局局長蘇錦樑（Greg蘇），喺七一後將會離開政府呢個熱廚房，尋日佢哋被問到七一後係咪仍然留任時就大耍太極，一個就話七一後會比較空閒，想參加跑步比賽，一個就話會去旅行同探屋企人。一個跑、一個飛，走夾唔抖咁款，莫非佢哋真係已經諗定後路走人﹖
Greg蘇將探家人去旅行
高永文前年出席一個親子跑步活動時畀同場嘅小朋友絆倒，跌到血流披面。佢尋日再次出席一個「慈善家庭跑」親子跑步活動啟動禮，而個跑步比賽就喺七月下旬先舉行。佢喺致詞時就問主辦單位，點解今年冇邀請佢參加跑步比賽，又話唔知主辦單位係咪擔心佢出事？佢仲話其實自己好想參加，尤其係七一之後。此話一出，現場傳媒立即追問佢係咪將會離任？佢就叫大家唔使作太多猜測，只係嗰段時間比較空閒喎。
Greg蘇尋日喺立法會時亦都被問到係咪唔會再留任，同埋該局副局長梁敬國（Godfrey）係咪理想人選？Greg蘇就冇明確回應，只係話︰「我七一後去旅行」同「探屋企人」，之後就急急腳走人。至於Godfrey尋日離開立法會時亦春風滿面，被問及係咪會升職做局長同覺得自己能否勝任時，雖然佢話唔評論，但從佢嘅燦爛笑容或可見端倪。
另外，有指民政事務局局長劉江華將會留任至下屆政府，該局副局長許曉暉（Florence）又再升職無望，將劈炮唔撈。Florence尋日出席公開活動時回應話，會繼續留喺崗位服務到下月卅日，「新一屆我相信喺唔同嘅崗位同地方都會繼續服務香港。」至於係乜嘢崗位、係咪仍留喺政府就未有明言。