中環出更：郭浩滿助畫家 走出藝術「窮途」
藝術似乎同「窮」字分唔開，所以好多父母都唔想仔女行藝術呢條路。尋日「全球水墨畫大展」舉行啟動禮，策展人郭浩滿話籌備過程中經歷一件令人感動嘅事，有位內地窮青年畫家被父母以死威逼佢放棄作畫，去東莞打番一份月薪五千蚊嘅工，結果郭浩滿好快就幫呢位畫家賣咗一幅畫畀人，換咗半年糧返嚟，總算解決咗窮畫家嘅窘境。
郭浩滿話佢將呢位十八歲畫家嘅作品放上網，即刻獲得平台內嘅專家高度評價，順利進入全球五百名水墨精英之列。佢講笑話呢位畫家嘅父母同天下父母一樣，希望個仔安安分分打份工，然後結婚生仔。依家佢啲畫作有市有價，相信好快都有女仔鍾意佢！
林湖奎指書法再成潮流
有份贊助今次活動嘅藝術收藏家孫少文都有到場，佢聽完都好有感觸，話依家年輕藝術家若想喺政府場地展覽，排到頸長都輪唔到佢哋。但係香港有一班貧窮嘅年輕人，其實極具藝術潛質，所以幾年前佢喺觀塘工廈創立「一新美術館」，目的就係想作為青少年畫家展示作品嘅平台。
孫少文又話美術館開幕以嚟，真係幫到一啲畫畫幾十年都未有展覽機會嘅人，連九十幾歲嘅人都有。不過，佢就未試過幫人解決溫飽問題，因為佢哋唔賣畫。
主辦機構藝育菁英基金會主席方黃吉雯（小吉）、著名水墨畫家王無邪都喺度。小吉兩年前為咗培養年輕藝術菁英，曾經搵名師開班教水墨畫，自己都學埋一份，嶺南派畫家林湖奎就係佢老師之一。咪以為寫書法、畫水墨畫已經式微，林湖奎話近十年又興番，事關好多政商界名人要學寫自己名，方便題字簽名嘛！
卓妮