今時今日嘅香港，醫院到底係救人定係害人嘅地方，真係好難講得埋。好似全城關注嘅捐肝救人事件，好媽媽之所以搞到緊急換肝，原來係拜醫生疏忽大意所賜。喂，人命嚟o架，醫者父母心去咗邊吖！
好媽媽鄧桂思先後兩次換肝都冇起色，家陣仲因為肺部受感染而命懸一線，簡直聞者心酸，搞成咁，背後原來另有故事。話說好媽媽一直係乙型肝炎帶菌者，去年因為腎病到聯合醫院求醫，今年初兩名專科醫生相繼開出高劑量類固醇治療，但冇同時開出乙肝抗病毒藥物，結果醫腎傷肝，好媽媽因為急性肝衰竭而需緊急換肝續命。
大家睇到喇，腎病病人突然變成肝病病人，唔係唔好彩咁簡單，而係聯合醫院兩名專科醫生鬼揞眼，冇帶個心返工，連病歷都懶得睇，卒之害人不淺。咁仲唔止，院方早知出事，仲靜雞雞成立委員會調查，但就一直冇向家屬交代，家屬覺得唔妥主動查詢，院方仲衰到千方百計拖延，直到瞞無可瞞先至公開認衰。可以咁講，如果今次事件唔係全城關注，院方好可能繼續瞞落去嘅咋，仲點會鞠躬道歉吖。
人命關天，咁低級嘅錯誤，本來可以避免，偏偏醫生無心裝載，結果鑄成大錯。正如病人家屬話齋，院方講一百次對唔住都冇用，事關已經換唔番媽媽嘅健康。所以話啫，醫院冇責任心，醫生冇醫德，醫管局為慳皮拒請藥劑師，真係死得人o架。好似去年一宗醫務聆訊吖，情節又係大同小異，一名乙肝腎病患者因為等唔切換肝而死亡，證明同類事故已經唔係第一次發生，到底公院仲要重複犯錯到幾時先至識得吸取教訓吖？
話時話，近年香港嘅公營醫療水平急速倒退，開錯腦、換錯心、輸錯血、打錯針輪番上演，甚至左右不分，幾匪夷所思嘅事都會發生。冇錯，人手不足係醫療事故長爆長有嘅最主要原因，十個煲七個蓋，增加出錯風險，但部分醫生嘅職業道德及責任心低下，醫管局嘅管治水平墮落，同樣係不爭嘅事實。每次搞出大件事，當局例必輕描淡寫，無人問責，試問醫醫相護之下，又點會唔係有恃無恐、變本加厲吖。
咁講喇，病人及家屬嘅要求好卑微嘅咋，只係希望醫生盡心盡力救治病人，就算最終結果未如人願，大家都會體諒。可惜吖，醫管局管理混亂，唔少醫生唔係掛住搵錢，就係做到滑晒牙，出咗事就一味卸責，所謂仁心仁術、醫者父母心喎，睇戲至有囉。到底香港地仲有幾多醫生記得「希波克拉底誓詞」，為病人謀利益，睇怕就算呢位古希臘醫者翻生都答你唔到咯。