笑看天下:講少兩句當幫忙

老嫩漢奸齊齊飛去美國「聽證會」唱衰香港;老漢奸李柱銘以為搵到個嫩漢奸黃之鋒拍住上,乞求美國干涉香港內政,對北京施壓以爭取「合理民主」。特朗普遲吓會飛去北京訪問,你估佢會對習主席指手畫腳,話香港要有「真普選」?早前狂人總統先拒絕同台灣嘅蔡英文再通電話,講明剛同習主席建立良好關係!連形勢都未睇清,唱乜都嘥氣!

一老一嫩漢奸,想起佢哋哭秦庭嘅樣都幾卡通化,老漢奸天真成世,嫩漢奸接其棒,一於把天真嘅薪火傳承下去,諗起都趣怪。有網民好記性,指黃衞兵早前話「不要被八十歲的老人建構他的未來」,但又去美國求七十歲嘅特朗普干預香港政制,構建佢未來。呢個後生仔為何咁早有癡呆症?

其實,黃衞兵呢個「思想家」,係爛果報日吹夜捧而結出嘅「香港奇葩」,想做烈士又怕死,想扮英雄又常露鼠目之光,佢講嘢自相矛盾不在話下,一心話追求「民主」,去到美國又話要「行使自決的權利」!老朽真係唔知佢究竟瞓醒未?一國兩制下,試問你又幾冇民主?你「行使自決的權利」帶頭衝擊立法會大樓,破壞社會安寧,法官都係話你「滿腔熱誠關心社會」,都係判你社會服務令,你話香港冇民主?咁唔該「行使自決權」趁早移民美國喇,睇吓如果你作出同樣行為衝擊美國國會,仲有冇咁好彩得到如此「民主」嘅禮遇?香港就係太多民主,是以禮崩樂壞,年輕人冇大冇細,已到了不知珍惜民主為何物!

黃衞兵在聽證會自以為好感性咁問:我六年前開始爭取民主,我當時十四歲,香港民主之父李柱銘經歷四十年的爭取,今年將已七十九歲,我好奇當我七十九歲時,是否已看到民主的來臨?呢個戇居問題笑死老朽!政治一天都嫌長,一味率先破壞香港法治基石卻以為在「盛天下蒼生」?唉,講少兩句當幫忙,冇人話你啞!