政情：公民講場：故宮館屢受抨擊栢志高死撐無事

西九文化區董事局尋日一致接納公眾諮詢報告，話公眾普遍支持興建故宮文化博物館，下個月底前會同北京故宮博物院簽訂正式合作協議。對於公眾同立法會議員質疑係假諮詢，行政總裁栢志高話報告好可能面對司法覆核挑戰，但相信管理局在執行時已達到法律要求，有信心向法院證明今次係真諮詢。老實講，依家法庭處理緊兩宗涉及今次項目嘅司法覆核，最終結果難料，栢志高咁講只係自我感覺良好，以為過咗海就係神仙。