政情：觀塘海濱踩車 何啟明畀人鬧
假期最好就係一家大細出去踩吓單車，近年仲有打工仔嘗試以單車代步返工，可惜單車徑唔係咁足夠。立法會議員何啟明（啟明）之前就趁住要去觀塘做訪問，專程踩單車入去海濱長廊視察一下，點知長廊嘅單車設施遲遲都未啟用，搞到佢要畀保安姐姐趕番出嚟，結果要推住部單車去做訪問。
觀塘海濱長廊雖已啟用七年，但仍未有單車設備畀市民使用，啟明上周專登踩單車落海濱長廊視察，點知一入到去就畀保安姐姐鬧番出嚟，搞到去做訪問都要推住部單車呀！佢之後解釋，話長廊其實有最少四個入口，得一個入口有告示話畀人聽唔准踩單車，就算有人踩咗入去都唔出奇。
轟遲未落實單車徑計劃
雖然政府有計劃用單車徑貫通海濱長廊，但就成日耍來耍去都唔肯落實。啟明就話其實區議會一早就傾好晒有關議題，加上有好多街坊想由觀塘、油塘一帶踏單車去觀塘工業區返工，希望局方快快手手優化當區嘅單車設施，提早落實單車徑計劃喎。