政情：外訪動盪以色列 立會12「烈士」唔怕死
近年以色列嘅局勢極為動盪，但立法會工商事務委員會就唔理咁多，打算組團到當地進行七日外訪，仲有成十二名「烈士」報名，泛民同建制分別各有六名代表。其中，帶團嘅委員會主席胡志偉就直言「唔怕死」，更透露所乘搭嘅航班有導彈干擾系統，能夠令人稍為安心。
其實早喺二○一四年時，內務委員會已經批准前往以色列外訪，但最終因局勢問題而無法成行。
航機設導彈干擾系統
胡志偉透露，今次外訪團將乘搭以色列航空，佢亦聽聞航班上有導彈干擾系統，所以咪話安心咗少少囉。不過，佢都知道香港對以色列實施咗黃色外遊警示，但認為警示已實施一段長時間，除非局勢突然惡化，否則成行機會都好高嘞！
胡志偉更話今次外訪團因「覺得要做而做」，主要學習對方嘅創新及科技，更形容當地嘅海水化淡技術首屈一指添！佢又話訪問團暫定喺七月尾成行，但頭尾兩日都喺航班上度過，實際只有四日半時間係實地考察，時間都好緊迫。