政情：呂慶森潮玩槳板瑜伽
仲喺山上面做瑜伽？近年有唔少人就喺海上面做先夠過癮！早排我哋見到本港慈善家呂明才後人呂慶森（Benjamin），唔好睇佢身形偏瘦，原來佢好鍾意做運動，其中水上運動亦係佢強項之一。除咗滑浪風帆同直立槳板外，佢話近年亦有與朋友一齊玩SUP Yoga（槳板瑜伽），喺海上一邊呼吸清新嘅海洋氣息，一邊喺槳板上平衡做瑜伽。
天氣愈嚟愈熱，最啱就係做水上活動。Benjamin話近年外國好多人都鍾意同埋幾個朋友一齊由玩槳板，轉為升級玩槳板瑜伽，通常幾塊槳板可以扣埋一齊又得，分開做都得，就算漂都係一齊漂嘅，做到熱仲可以落水添，透過喺海上練習平衡，提高瑜伽水平。
話易過玩滑浪風帆
佢話依家喺西貢都不時會有人玩SUP Yoga，但都係外國人多，本地人反而少，佢認為唔玩瑜伽都可以試吓玩普通槳板，指香港海面算平靜，槳板起碼易過玩滑浪風帆喎。而佢太太雖然游水唔算好叻，但玩槳板都玩得幾好o架，咁夏天又可以多個消暑活動喇！