政情：鄭松泰再追殺譚志源難甩身
選舉事務處喺特首選舉後「甩轆」遺失兩部電腦，逾三百萬名選民私隱恐外洩，立法會議員鄭松泰上月底喺內務委員會要求運用《立法會（權力及特權）條例》（特權法）追查事件，但被內會主席李慧琼投下決定票否決。要為「失腦」負責嘅政制及內地事務局局長譚志源，如果以為咁就甩難恐怕為時太早，皆因鄭松泰時來運到，喺立法會大會抽中可以提出議員議案，內容同上次內會如出一轍，議案死過翻生，繼續追殺譚志源。
上月提議案 遭內會否決
選舉事務處「失腦」，事後認衰指失竊電腦嘅儲物室冇保安把守，將逾三百七十萬選民資料帶到特首選舉會場的做法亦唔恰當，負責選舉事務嘅譚志源自然責無旁貸。鄭松泰上月二十八日率先喺內委會出手，要求運用特權法成立專責委員會調查事件，但議案最終喺廿五票贊成、廿五票反對下，被內會主席按議事規則投出決定一票後否決。
唔知係鄭松泰好彩抑或係譚志源倒楣，最新一輪立法會大會議員議案抽籤，第一位正係鄭松泰，而佢提嘅議案內容同上次內會一模一樣。換言之，今次議案翻生，譚志源當然冇得甩身，而鄭松泰同一眾民主派議員當然唔會放棄咁好追殺佢嘅機會。
值得留意嘅係，同鄭松泰同時獲抽中嘅仲有民主黨（白鴿黨）黃碧雲，佢嘅議案正正係「毋忘六四」。民主派或會好開心呢個議案有機會六月四日前喺會上提出，但前提係泛民喺《撥款條例草案》拉布失敗。
泛民拉布或拖垮六四議案
立法會主席梁君彥預告喺十七日結束《撥款條例草案》嘅審議，屆時將重新開始處理議員議案，根據議事規例第十八條，因鄭松泰嘅動議係根據特權法提出，所以會優先處理；而其後將先處理早前延擱嘅議員議案，包括郭家麒嘅「促請下任行政長官重啟政改」同毛孟靜嘅「港人港水」，即係話黃碧雲嘅六四議案係排第四。
喺六月四日之前，計埋十七日亦只剩番三次大會，鄭松泰同郭家麒提出嘅動議都係熱門議題，可能會佔用一整次大會嘅討論時間，假如泛民堅持喺《撥款條例草案》拉布，只會令處理議員議案嘅日子順延，到時六四議案趕唔切喺六月四日前討論，都係泛民自己一手造成。