每年七月一日，民陣搞遊行同集會都係例牌菜，行禮如儀，都冇乜驚喜喇。民陣召集人區諾軒尋日就話，打算申請七一遊行後，去俗稱公民廣場嘅政府總部東翼前地集會，測試政府係咪有意和解喎。其實候任特首林鄭月娥一早已經講過，會考慮重開公民廣場，民陣事先張揚話要申請，唔通係諗住既可測試林鄭有冇誠意解決撕裂，又可以攞番個彩？不過，開放公民廣場就叫大和解，相比起特赦，似乎雞毛蒜皮咗啲囉！
