政情：八網難逃：容海恩青島賞花歎啤酒
立法會議員容海恩（Eunice）喺社交網站上載咗與花嘅合照，原來佢做主席嘅青專網去咗青島考察，佢順道去咗嶗山一間道觀，見到極多紫薇花，仲試咗好幾種青島啤酒添！唔通佢酒量好好？
一場嚟到青島，參觀青島啤酒博物館是常識吧！Eunice都唔例外，佢話自己試咗黑啤、白啤、無酒精等四、五種新鮮啤酒，飲到好飽喎！咁即係飲咗好多？佢就笑指「個個都知我唔飲得o架啦」，加上怕有啤酒肚，所以每樣都係試咗少少咋，仲唔敢學以前啲青島人咁用碗飲，怕倒得太多喎，強調自己冇飲醉o架！
大讚乾淨 有外國感覺
佢又大讚青島好乾淨，見到五、六個好似淺水灣咁嘅海灘，沿海嘅屋超似豪宅，而且當地人唔多，人口疏落到「聽唔到有人講普通話」，覺得好有外國嘅感覺喎！佢仲話計劃喺暑假嘅青島啤酒節，再帶啲青年去青島睇下。