政府宣傳片成日講︰「市民時刻精明，騙徒無所遁形。」可惜言者諄諄，係要上鈎嘅始終都會上鈎，電騙案呢輪好似排住隊起勢咁爆，郁吓就斬獲幾十萬，而且唔少受害者都係年輕人同高學歷人士，都咪話唔得人驚。
呢嗱，話口未完又嚟嘞。一名嚟香港中文大學修讀博士課程嘅內地男生，早前收到陌生男子來電，對方自稱係入境處職員，要求佢存款作調查之用，結果被騙七十幾萬人仔；另一位嚟自內地嘅二十幾歲港大交流生，同樣收到「入境處職員」電話聲稱佢涉嫌干犯刑事罪行，結果又係唔見七十萬人仔。
以前就話「跌錢黨」、「寶藥黨」等專向老人家埋手，家陣扮香港同內地執法人員呃後生仔呢條水先至好搵。警方今年頭三個月接獲嘅一百七十多宗電騙案裏面，「假冒官員」手法佔最多，損失金額高達三千七百萬港元，佔整體數字九成；反觀「虛構綁架」等傳統騙術，損失金額只係三百零萬。電騙案好多受害人係內地交流生，有人歸咎佢哋安全意識太差，但如果以為淨係內地交流生中招，咁就大錯特錯嘞，今年首季電騙案受害人中，近七成係香港永久居民，新來港人士只係佔一成咁大把。
可能有人會問，大學生讀咁多書點解一樣咁易落疊，唔通騙徒手法真係咁天衣無縫？講真，萬騙不離其宗，不法分子嚟嚟去去都離唔開假冒官員，又或者聲稱有重要包裹待領等套路，頂多係枝節上有啲「創新」，例如氹受害人下載應用程式後輸入銀行戶口密碼等資料，等對方以為私隱受到保障，不虞有詐，再靜雞雞偷走對方密碼，並透過網上銀行擸錢走人。講真，無論官方同傳媒都提過N次，中港兩地執法人員唔會以預錄語音形式致電市民，而喺香港接到「+852」字頭電話，亦基本上可以肯定有景轟，點解咁都仲有人上當呢？
所以話，中港執法部門加強情報交流，聯手打擊詐騙集團固然重要，但如果市民唔打醒十二分精神，時刻保持高度警惕，類似電騙案只會陸續有來。咁又係吖，蒼蠅不叮無縫的蛋，既然有啲人易呃易氹咯喎，又點止吸引電騙黨徒咁簡單？大家不妨睇吓參與旺角暴動嘅後生仔，一個接一個被判重刑，有網民就講得啱嘞，精人出口，笨人出手，人哋就榮華富貴，你哋就墊人屍底，有啲人月入十萬做立法會議員，有啲人就有米到外國升學讀書，仲有冇再蠢啲吖？至於嗰班幕後策動佔中嘅黑手，到依家仲係風流快活，毛都冇少一條，後生仔女？行先死先關人個關喇！
老土啲都要講句，錢財身外物，錢冇咗可以搵過，青春同前途一去不復返，畀人搵完老襯至呻笨已經太遲，年輕人最緊要都係帶眼識人吖！